|
Quadratum sex habet latera, quocunque jacitur, super latus recidit et
residet.
Quatuor sunt Evangelia et evangelistae, quadrigae Aminadab, quatuor
millia in eremo refecta, quatuor annuli in arca, quatuor pedes in mensa,
quatuor animalia Ezechiel, quatuor virtutes cardinales, quatuor
operimenta tabernaculi, quatuor flumina paradisi, quatuor partes crucis,
quatuor latera civitatis in Apocalypsi, quatuor vigiliae noctis, quatuor
partes vestimentorum Domini in Joanne, quatuor partes mensurae in
Matthaeo; quatuor liciis [Vulg. initiis] appensum erat linteum Petro
ostensum (Act. 20).
Quercus arbor quaerens alta, fortis, porcis cibum ministrat, multumque
durabilis est.
Quinque libri Moisi, quinque stolae datae Benjamin a Joseph, quinque
panes in Evangelio, quinque millia hominum, quinque partes Joseph datae
prae aliis fratribus, quinque viri Samaritani, quinque columnae ante
Sancta sanctorum, quinque virgines fatuae et quinque prudentes, quinque
lapides quos sumpsit David de torrente, quinque effusiones sanguinis
Domini, quinque vulnera in corpore Christi, quinque sensus in corpore
humano.
|
|
