|
Faber noctem tanquam diem transigit, sedet juxta incudem, considerat
opus ferri, vapor ignis urit vestes ejus, et carnes ejus in calore
fornacis conterit, vox mallei intonat aurem ejus, et contrahit
similitudinem vasis oculus ejus; cor suum dabit in consummationem
operum, et vigilia sua ornabit imperfectionem (Eccli. XXXVIII),
officinam habet vel fornacem, incudem, forcipes, malleum, molam ad
exacuendum, ignem, folles, aspersorium.
Facies facturam, et sicut vultus voluntatem hominis declarat,
cognitionem facit et discretionem.
Faex in fundo residet, amara est, lutulentum quiddam est, de vino
procreatur, odorem retinet.
Falx acuta est, recurva, propius tondet.
Fames vitales meatus arctat, opus attenuat, squalorem generat, vilia
pretiosa reputat, cutem tumescere facit et pilosam, desidiam et
appetitum excitat.
Farina minuta est, munda est, cum labore habetur, per aquam
conglutinatur, fermentatur, acedinem sumit.
Fasciculus ex multis collectis fit, nisi bene colligatur, effluit.
Favilla levis est, in nihilum redigitur, post ignem remanet.
Favus cellulatus est levis, dulcis, ceram continet vel elicit.
Fax concava est, sicca, fragilis, seipsam consumit, lucem maximam
diffundit, cum stridore comburitur.
Febris calorem ingerit, tremere facit, palatum corrumpit, sudore
terminatur, symptomata relinquit.
Fenestra in cardinibus vertitur, patula est, lumen excipit, et radios
solis.
Fera silvas inhabitat, indomita est et crudelis.
Fermentum modicum de pasta farinae conglutinatae immittitur.
Ferrum ponderosum exstinguitur ex aqua, magnetem sequitur, rauce sonat,
ex ipso fiunt arma, in igne mollescit, crebis tunsionibus extenditur, in
ore equi ponitur, equum regit, ipsum de facili circumducit, cumducit,
duabus corrigiis protenditur quibusdam appendiciis.
Ficus lata habet folia, succus eorum pruritum gignit, post grossos
affert, qui de facili cadunt, nec sunt esibiles, fructus ejus dulcis.
Figulus sedet ad opus suum, convertit pedibus suis rotam, in
sollicitudine positus semper propter opus suum, et innumera est omnis
operatio ejus, in brachio suo formabit lutum, et ante pedes suos
formabit virtutem suam. Cor suum dabit ut consummet linitionem et
vigilia sua mundabit fornacem.
Filius haereditatem exspectat, obediens est, patri similis, ingratus ab
haereditate expellitur.
Filum gracile est, tortum, longum, vestem consuit, setam sequitur.
Fimus dispersus terram fecundat, fetorem emittit, de animali oritur.
Fistula concava est et perforata, tenuiter sonat, ore sufflatur, decipit
avem.
Flamma ex multis scintillis fit, in altum tendit, rutilat vel splendet,
rubicunda est.
Flos visu delectat, odore afficit, spes est fructus, cito marcescit,
exponitur aeri, vere nascitur, campum ornat, suavis est, frigore
laeditur, calore nimio uritur, vel grandine intemporanea dejicitur.
Fluvius rapidus est, ex abundantia crescit aquarum et pluviarum,
profundus est, solitum alveum non deserit.
Feminalia linea erant stricta, sponte assumebantur, pudenda tegunt.
Fenum aestate viret, molle est, percussum facile sentit injuriam,
succisum statim aret, in clibanum mittitur, cibus est jumentorum.
Folium tenue est, latum, leve, umbram facit, arborem ornat, fructum
arboris legit, in autumno pallescit, vento dejicitur, viride est, vento
agitatur, et stridet.
Follis ex ligno et corio fit, os habet interiori parte, spiramentum
attrahit, et emittit aerem ut ignem excitet.
Fons de terra scaturit, frigidus est, in rivos dividitur, purus est,
dulce murmurat, sitim relevat, in hieme calet, clarus est, leviter
turbatur, scaturigines sursum tollit.
Forcipes duo brachia habent, scindunt, dum scindunt, stringuntur, clavo
junguntur, connectuntur in medio.
Fornax modica est, calida est, aurum purgat, ligna incinerat, scoriam
adnihilat.
Frigus poros constringit, membra contrahit, fructificare non sinit.
Frons tenera est, cito rubet, locus est verecundiae, maculam non celat.
Fructus odore mulcet, gustu reficit, naturam arboris ostendit, calore
solis coloratur, maturus decidit, directe jaculatur.
Frusus genus ruborum sponte nascitur, in densum pullulat, spinosus est,
immeabilis, tenebrosus, densus, impletus, implexus, et sibi cohaerens,
hispidus, incultus, sterilis.
Fucus non laborat, pungit, aliorum labores devorat.
Fulgur in ora cadit, incutit, subito oritur, clarum est et splendidum,
ex calore provenit.
Fumus ex igne nascitur, in directum ascendit, lacrymas provocat.
Funda motu vibratur, de corio fit, circum caput rotatur, lapidem
continet, duabus corrigiis appenditur, dure ferit.
Fundamentum profunde locatur, firmum est, ex impolitis fit lapidibus, in
imam terram jacitur, terra operitur, latum est, aedificium sustinet.
Fur de nocte venit, spoliat, subito invadit, et perimit incautos,
aucupatur, domum suffodit, observatus latet, immisericors est, secretos
introitus quaerit, ad omnem strepitum pavet.
Fusciuncula recurva est, duos uncos habet, et fere ferrea est.
Fusus filo involvitur, in utroque fine acutus, in medio latus, dextera
manu volvitur.
|
|
