|
Haereditas a Domino excolitur, Dominum pascit, firmiter possidetur.
Hamus aduncus, esca tectus, gracilis, linea appensus.
Harena [arena] innumerabilis est, minuta, amara, sterilis, ponderosa,
humida, bibula.
Harundo [arundo] vacua est, fragilis, omni vento cedit, stridula est, in
palude crescit, manum contrectantis sauciat, exterius viret, interius
marcet.
Hasta longa, teres, directa, plana, laevis, gracilis, rigida,
penetrativa, ferro munita.
Hedera serpit, semper viret, similis rosae crescit, sterilis est, comam
non deponit, attractivae naturae est, fetores arcet, victores coronat.
Heremita, videatur Eremita.
Herodius avis rapacissima, volantium maxima, aquilam vincit, in maximis
petrarum nidificat.
Hiems aquas congelat, frigida est, noctes longiores habet diebus, humida
est.
Hinnulus in excelsis moratur, velox est, visu perspicuus, in rupibus
summis pascitur.
Hircus fetidus, luxuriosus, hispidus, immundus, immolandus, ruminat, et
findit ungulam, cornibus insignis.
Hirundo garrula est, in domibus habitat, sinuosis circumflexibus volat,
in nidis aedificandis et fetibus educandis solertissima, lapsura deserit
nec appetit culmina, alias aves non impetit, nec impetitur ab eis, maria
transvolat, ibique hieme moratur, et per adventum suum veris nuntiat
initium.
Homo fragilis est, ad peccatum pronus, ad resurgendum ineptus, ad
constantiam tenendam infirmus.
Honus, videatur onus.
Hortus, videatur ortus.
Hospes in alieno moratur, verecundus est, cito transit, non bene
confidit in aliena domo.
Hostia eucharistiae in colore candida, in quantitate modica, rotunda,
triticea, immista, azyma, inscripta.
Hostium, videatur ostium, quia ab ore deducitur.
Humerus onera sustinet, geminus est, inflexibilis, fortis, latus.
Humor junctus calori nutrit, a terra in truncum, a trunco ascendit in
ramos.
Hyacinthus cum aere mutatur, in sereno perspicuus, in nubilo obscurus.
Hypocrita sua mala celat, pallidus est, bono sua praedicat, incultus
ingreditur, omnia operatur ut videatur, superbus, impatiens.
Hyssopus humilis est herba, pectus purgat, petrae haeret, radix ejus
tumorem pulmonis sedat.
|
|
