|
Quoniam de ordinatione claustri materialis, frater, aliquid
mediocritatem sectando dicturi sumus, ordine congruo consideranda vobis
quatuor occurrunt, scilicet qui sint, qui teneant ordinem, aut quid
teneant, ubi maneant et unde vivant, ut plures sint et boni propositi,
ut cohabitandi suppetant aedificia, et victui habeant necessaria. Sit
tamen in numero circumspectio, in proposito devotio, in aedificiis
mediocritas, in rebus possessis frugalitas, ne si creverit turba,
nascatur turbatio, aut pro difficultate propositi subrepat desperatio,
ne ex aedificiorum magnitudine subintret elatio, aut ex abundantia rerum
se inserat tentatio. Qui enim volunt divites fieri, incidunt in
tentationes et in laqueum diaboli (I Tim. VI).
|
|
