|
Post porticum renuntiationis sequitur templum rectae conversationis. In
hoc templo est altare aureum, est mensa propositionis aurea, sunt et
candelabra de auro purissimo facta. In altari accendebantur thymiamata,
in mensa panes ponebantur, in candelabris lucernae. Altare aureum, sunt
corda electorum; thymiamata, bona opera: ordo thymiamatum, boni operis
exemplum. Fumus qui ascendit superius, est intentio orationis, quae ex
affectu cordis ad desideranda coelestia tendit. Mensa vero aurea est
divina Scriptura; panes sunt apostoli sive eorum successores, ex quorum
actibus tanquam ex panibus reficiuntur fidelium mentes. Qui panes
propositionis convenienter possunt appellari, quia ad imitandum
proponuntur universo orbi. Decem candelabra, sunt decem legis praecepta;
lucernae lumen doctrinae. Possunt et haec aliter dici. Sit igitur altare
dilectio, mensa lectio, candelabra meditatio. Puritas auri in altari,
est animus perfectus in dilectione. Puritas auri in mensa, sanus
intellectus in lectione. Puritas auri in candelabris, purus affectus in
meditatione, ut nihil carnale quaerat dilectio, nihil haereticum doceat
lectio, nihil terrenum optet meditatio. In altari accenduntur
thymiamata, in mensa ponuntur panes, in candelabris lucernae; thymiamata
orationis, panes refectionis, lucernae cognitionis. Per orationem enim
quaeritur Deus, per refectionem gustatur, videtur in lumine cognitionis.
Quaerendo desideratur, gustatus dulcescit, cognitus amatur. Habent
thymiamata odorem, panes saporem, cognitio amorem. Oratio siquidem
redolet Deum, panes sapiunt, cognitio diligit. Infundit autem Deus odori
suavitatem, sapori dulcedinem, amori dilectionem, ut sit odor suavis,
gustus dulcis, amor delectabilis. Haec omnia debent esse in conversione.
Haec ministrantur a sacerdotibus et levitis in templo conversionis. Si
autem oraculum intrare desideras, intra in sanctuarium Dei, ut
intelligas in novissimis eorum (Psal. LXXII), eorum videlicet qui
perierunt propter iniquitatem suam, et eorum quorum mors pretiosa est in
conspectu Domini (Psal. CXV). Ibi enim intelliges et praemia justorum,
et poenas damnatorum. In hoc oraculo posuit Salomon arcam foederis, et
in ea tabulas legis. Est autem oraculum divinae revelationis secretum.
Ibi Salomon arcam posuit, et ibidem qui pacem desiderat, mentem ponit.
In ea sunt tabulae legis, scientia videlicet divinae districtionis. Huc
solus pontifex intrat. Sunt enim pauci, quibus revelatur consilii divini
secretum. Hic solus ores, si solitarius esse desideras, si suavitatem
quietis amas. Attende ergo ut oratio tua sit discreta et secreta, dulcis
et humilis. Discreta propter idiotas, secreta propter hypocritas, dulcis
et humilis appetitu, ut quod appetit diligat, nihil altum sapiens
humilia concupiscat. Sit pura et tranquilla, nec quidquam commodi
temporalis oratio postulet, nec tranquillitatem orationis curiositas
conturbet. Si igitur talis esse desideras, ad illud claustrum non
manufactum, quod est in coelis, pervenire festinas.
|
|
