|
Civitatis magnae Hierusalem quaedam pars adhuc in terris peregrina
ducitur, quaedam vero pars in coelis firmiter locata stabilitur. Haec
autem Hierusalem ad illam coelestem quandoque transiet, in qua nemo
morietur, sed in aeterna felicitate sine fine vivet. Nemo enim ad illam
felicitatis aeternitatem transire merebitur, nisi qui se civibus illius
patriae bene vivendo in saeculo hoc moribus conformabit. Sed qui in hoc
saeculo praesenti caelibem vitam ducere cupiunt, in futura vita supernis
civibus conformes erunt. Quatuor siquidem civitates in divina Scriptura
fuisse perhibentur, quarum unaquaeque Hierusalem nuncupatur, id est,
materialis et mystica, moralis et anagogica. Materialis Hierusalem est
quaedam civitas in Judaea posita, mystica vero est Ecclesia, moralis
quaelibet fidelis anima, anagogica coelestis patria. Prima constat ex
lapidibus et lignis; secunda ex justis et justificandis; tertia ex
virtutibus; quarta ex angelis et hominibus. Materialis aliquando
destruetur, mystica transferetur, moralis aedificabitur, anagogica vero
in aeternum non commovebitur. Prima continet res gestas, secunda
mysteriorum figuras, tertia exempla morum, quarta diversitates
coelestium mansionum. Restat igitur ut de iis, quae praemisimus, ad
aedificationem claustralium aliquid disseramus.
|
|
