|
Illa superna civitas, quae Hierusalem dicitur, inexpugnabili muro
perfectae securitatis undique munitur. In hac civitate duodecim portae
sunt, per quas beatorum animae ad illud claustrum non manufactum, quod
est in coelis, festinant introire. Ex singulis margaritis singulae
portae fiunt, quoniam per unitatem fidei, et puritatem mentis ad
coelestem patriam justi pervenientes intrabunt. Plateae ejus auro mundo,
et lapidibus pretiosis sternuntur, quoniam nihil in ea, nisi puritas
invenitur. Per omnes vicos ejus alleluia canitur, quia ubique per eam
divinae laudis gloria praedicatur (Apoc. XI). In hac civitate Hierusalem
quae interpretatur visio pacis, fundatur claustrum perfectae
beatitudinis. Hoc claustrum habere dicitur firmae stabilitatis
quadraturam, aequitatis latera, perseverantiae bases, columnas virtutum,
divinae protectionis capitella. In hoc claustro angelorum conventus
residet, et in eo perfectae charitatis ordinem tenet. Ibi diversis
angelorum spiritibus diversa commendantur officia, singulis singula.
Sunt enim ibi angeli, archangeli, throni et dominationes, principatus et
potestates, virtutes, cherubin et seraphin. Huic angelorum conventui
Deus Pater omnipotens abbatis more praeponitur. Hic conventus per
sapientiam Filii (qui minor est Patre secundum humanitatem) more prioris
regitur, et Spiritus sancti gratia moderatur. Ad hoc claustrum justi
relictis omnibus quae possident, pervenire properant, ut in eo perfectae
religionis habitum, id est immortalitatis et innocentiae vestem sumant.
Adhuc tamen in locis ad hoc deputatis exspectant, donec ad illud magni
judicii capitulum pervenire queant, ut ibi recepturi vestem perfectae
religionis audiant: Venite, benedicti Patris mei, percipite regnum quod
vobis paratum est ab origine mundi (Matth. XXV).
|
|
