|
Erat structura muri civitatis supradictae ex lapide jaspide (Apoc. XXI).
Structura muri civitatis, sunt diversa opera cujuslibet bene operantis.
Bona siquidem opera muri sunt, quia non tantum diabolo, sed etiam vitiis
resistunt. Fiunt de lapide jaspide, id est de quolibet homine in bono
proposito perseverante. Tunc enim lapis in muro boni operis firmiter
jacet, cum aliquis lineam rectae conversationis tenet. Est autem
jaspidis viridis color, quasi propositi nostri rigor. Sicut enim arbor
dum viret, naturalis vegetationis vigorem tenet, sic viror jaspidis
designat rigorem cujuslibet in bono proposito perseverantis. Viridis
color aliquando in pictura est, aliquando in tinctura. Nascitur in
herbis, creatur in gemmis. In pictura viridi colore lapis vel lignum
linitur, sed cito color in pictura deletur. In tinctura colore viridi
pannus imbuitur, sed pluviis aut nimio calore multoties decolaratur. Cum
herbis viror nascitur, sed hiemis gelu marcescit, vel aestatis calore
siccatur. In quibusdam gemmis creatur color viridis, nec tamen mutatur
longitudine temporis, nec fuscatur nube cujuslibet obscuritatis. Per hos
quatuor diversos effectus colorum possunt assignari quatuor diversitates
hominum. Sicut enim quod pingitur leviter deletur, sic multi sunt qui
quod proponunt citius relinquunt. Sunt autem alii qui in tinctura
viriditatis aliquandiu perseverant, aliqua tamen occasione suborta,
quasi amisso colore, famam bonae opinionis mutant. Sed et alios esse
novimus, quos herbae viriditati per similitudinem comparamus, qui cum in
pueritia et juventute religiose vivant, cum senectuti approximant, gelu
tentationis mentem dissipant, et accensi nimio calore libidinis in senio
flagrant, et sic in articulo mortis, amisso virore propositi, moriuntur
cum herbis. Viriditatem vero gemmarum, quae creatur in ipsis et
permanet, dicitur habere justus, qui propositi sui rigorem sine defectu
tenet. Qui igitur in viriditate boni propositi remanent, quasi jaspis in
structura muri praedictae civitati poni debent.
|
|
