CAP. VI. De Hierusalem mystice et allegorice.

Mystice Hierusalem est Ecclesia per orbem terrarum ubique diffusa. Ipsa enim Hierusalem designat Ecclesiae pacem. Sub interpretatione siquidem hujus nominis intelligere solemus visionem pacis. Habet autem civitas ista plures inimicos, multos scilicet diversi generis haereticos, qui non tantum Ecclesiae pacem suis incursionibus turbant, sed etiam totis viribus conantur, ut eam a statu suae rectitudinis subvertant. Sunt et hujus civitatis cives et amici, quilibet viri catholici, qui non solum haereticis verbo contradicunt, sed etiam usque ad sanguinem certantes, eis resistere non desistunt. Multis modis Arius, Hebion, et Cerinthus, et alii haeretici pacem Ecclesiae suis assertionibus subvertere sunt conati. Sed contra beatus Augustinus, Hieronymus, et Ambrosius, et caeteri viri catholici, sancti Spiritus gratia roborati, occurrerunt eis in faciem, ut defenderent Ecclesiae pacem. Usque ad sanguinem Stephanus certasse legitur, qui norma nostra interpretatur. Normam siquidem justitiae Stephanus nobis proposuit, qui primus mori pro Domino non dubitavit. Mortem enim, quam Salvator pro omnibus dignatus est pati, hanc ille primus reddidit Salvatori. Lapidatur Stephanus, crucifigitur Petrus, et impletur quod dicitur: Sequere me (Joan. XXI). Imitatur enim Petrus Christum per mortem consimilem, id est, per crucis passionem. Simon, non tantum Petrus, sed etiam Cephas appelatur. Cephas, ut quidam volunt, caput interpretatur. Unde acephali, sine capite solent appellari. Simon vero obediens interpretatur. Sicut enim membra subjacent capiti, sic et praelatis debent obedire subjecti. Petrus vero interpretatur agnoscens. Dissolutionem Petri cognoscimus, si ejus trinam negationem diligentius attendamus. Si vero attendimus Petri recordationem, scire poterimus negationis agnitionem. Recordatus enim Petrus verbi, quod dixerat Dominus: Priusquam gallus cantet, ter me negabis, exivit foras, et flevit amare (Luc. XXII). Ter Petrus Christum negasse dicitur, et ne desperet, ter utrum diligat Christum, a Christo Petrus interrogatur. Amas, amas, amas? Amo, amo, amo. Pasce, pasce, pasce. Amas Patrem, amas Filium, amas Spiritum sanctum? Amo, amo, amo, corde, ore et opere. Pasce, pasce, pasce, vita, doctrina et exemplo (Joan. XVI). Ecce quomodo discutitur Petrus, ut ei grex Dominicus pascendus tribuatur. Ecce qui ad vocem ancillae prius Christum negaverat, nunc fratres confirmat; et qui mulieris verba tolerare non potuit, pro Domino crucem portare non renuit. Sunt igitur cives Hierusalem, qui defendunt Ecclesiae pacem. In hac civitate, David rex fuisse legitur, quae tunc temporis inter caeteras urbes sublimior habebatur (II Reg. V). David manu fortis interpretatur. In hac igitur civitate ille manu fortis primatum tenuit, qui mortem moriens stravit.