|
Inter omnes quaerentium faciem Dei Jacob occupationes, nil aeque memoria
pariter et usu dignum arbitror, ut ecclesiastica sacramenta simul et
officia. Illa enim de fide et moribus recte considerata docent et
instruunt, haec rerum auctori pro donis quotidianis vectigalia
rependunt, ut ampliora promereantur divinae largitatis beneficia.
Propter utraque, quae de Scripturarum silvis elicere congrua potuimus,
in unum colligere studuit parvitas nostra et primo de consecratione
ecclesiae materialis, quae sacramentorum nostrorum praefert figuram,
succinctis agere verbis.
|
|
