|
Notandum etiam quod baptizandi in sabbato paschali, quarta feria quartae
hebdomodae Christianae militiae, id est quadragesimae, deferuntur ad
ecclesiam ut exorcizentur et catechizentur. Ideo autem quarta feria
quartae hebdomadae hic officio deputata est, ut qui baptizandi sunt,
ipso numero intelligant se non ad otium, sed ad Christianam vocari
militiam; ac si quarta aetate, scilicet juventute quae pugnae est apta,
ad militiam eligantur. Et quia praedicta quarta feria de fide
inquiruntur et instruuntur, ideo dies illa dies scrutinii, et, officium
illud scrutinium, appellatur. Vocantur autem praedicta die per lectionem
quae praecedit epistolam quae et ipsa de aquis baptismi est, sicut et
ordinandi propter similem causam quarta feria Quatuor Temporum ante
Epistolam vocantur per lectionem quae pertinet ad Spiritum sanctum, per
quam scilicet consecrandi sunt. Unde et ea die veniunt de iis quae ad
officium suum pertinent requirendi et examinandi.
|
|
