|
His peractis, benedicuntur fontes, et traditur novae vitae iter
aggredientibus fidei Symbolum; quod a duodecim apostolis ordinatum est
et totidem sententiis comprehensum. Postea interrogatur si abrenuntiet
Satanae, etc. Et post trinam responsionem immersione trina baptizatur,
quia ibi Trinitatis virtute et gratia mundatur a peccatis. Dehinc sacro
chrismate ungitur in vertice, ut intelligat se promoveri in regem et
sacerdotem, non ministerio quidem sed dignitate sanctitatis, secundum
illud: Vos estis genus electum, regale sacerdotium, gens sancta, populus
acquisitionis. (I Petr. II). Et ut a Christi consortio vocetur
Christianus, et aeterni regis sit cohaeres, huic sacramento post aquam
baptismi Spiritus sanctus infunditur, ut sit renatus ex aqua et Spiritu
sancto, imo infusus ostenditur. Si quidem Spiritus sanctus in ipsa trina
immersione remissionem confert peccatorum. Sed non simul cum immersione
poterat exhiberi ejus sacramentum.
|
|
