|
Unctio infirmorum ab apostolis est instituta. Unde Jacobus: Infirmatur
quis in vobis? inducat presbyteros Ecclesiae et ungant eum oleo sacro,
et alleviabit Dominus infirmum; et si in peccatis fuerit, dimittentur ei
(Jac. V). Hic sacramentum est unctio, res sacramenti peccatorum
remissio. Hoc sacramentum contemnere, damnabile est. Sine contemptu
absque eo decedere, damnabile non est. Hoc sacramentum saepius iterari
potest, sicut et quod majus est eucharistiae sacramentum. Augustinus
tamen dicit sacramentum non esse iterandum. Sed hoc de sacramentis
baptismi et confirmationis, de quibus tunc sermo erat, intelligendum
est; vel forte non dicitur iteratio sacramenti, etsi pro parte iteretur.
Licet enim iteratio fiat quantum ad personam quae iterum suscipit
sacramentum, tamen non est iteratio quantum ad hostiam vel oleum.
|
|
