CAP. XXXVIII. De diaconibus.

A Levi filio Jacob, Levitae, id est assumpti denominantur: per quos cuncta sacrificia administrabantur sub sacerdotibus. Hos Ecclesia diacones, id est, ministros nuncupat. Horum officium est in ecclesia Evangelium legere, sacrificium in altari componere, corpus et sanguinem Domini distribuere, licet non ubique hoc observetur, licentiam abeundi populo dare, et, si necesse est, praedicare et baptizare.