|
Papa dicitur, quia Pater Patrum. Hic universalis dicitur, quia universae
praeest Ecclesiae. Hic quoque apostolicus appellatur, quia principis
apostolorum vice fungitur. Hic etiam summus pontifex nuncupatur, quia
caput est omnium episcoporum. Hujus nomen in ordinatione mutatur, quia
Petri nomen in praelatione Ecclesiae a Christo mutatum est. Huic etiam
claves traduntur, sicut Petro a Domino claves regni coelorum traditae
sunt, ut se janitorem regni coelorum esse cognoscat. Ejus officium est
missas et divina officia ordinare, canones etiam pro tempore ad
utilitatem Ecclesiae promulgare vel immutare, Augustum consecrare,
pallia archiepiscopis, privilegia Ecclesiis dare, totam Ecclesiam vice
Christi gubernare. Itaque papa vicem et locum Christi tenet, episcopi
apostolorum, presbyteri septuaginta duorum discipulorum, reliqui
ministri diaconorum ab apostolis constitutorum.
|
|
