|
Post haec benedicitur aqua, cui admiscentur sal et cinis, et ad ultimum
vinum. Aqua expiationem significat, quia per aquam coinquinata emundari
et ablui solent. Expiatio autem peccatorum recte fit, si adhibeatur sal
sapientiae, qui corruptibilia a corruptione servat. Unde in lege
praecipitur: In omni sacrificio offeres sal; nec auferes sal foederis
Domini Dei tui de sacrificio ejus (Levit. II). Quod est: Nihil Deo
temere offeras. Illa enim opera placent illi quae sale sapientiae sunt
condita. Cinis vero significat reliquias, id est memoriam Dominicae
passionis; quam etiam significabat cinis vitulae aspersus ad expiationem
populi, sicut in Deuteronomio legitur. Non est autem expiatio a peccatis
sine fide Dominicae passionis. Vel cinis, qui de carbonibus efficitur
exstinctis, mortificationem vitiorum significat et exstinctionem. Vinum
spiritualem dulcedinem significat, quia ab ubertate domus Dei mentes
sobriae inebriantur, ad quam per praedicta venitur, sicut promittitur in
figura, cum vinum post caetera omnia infunditur. Potest etiam dici quod
aqua et vinum duas in Christo significant naturas, quarum fides emundat
a peccatis.
|
|
