|
In hac aqua tingit pontifex pollicem suum, et facit crucem in altari
quae attingit totam ejus longitudinem et latitudinem; deinde facit
crucem per quatuor cornua altaris. Altare enim Christi figuram praefert;
quod per quatuor cornua distenditur, quia Christus in membris suis per
quatuor mundi cardines dilatatur. Dilataberis, inquit, usque ad
orientem, et occidentem, et septentrionem et meridiem (Genes. XXVIII).
Bene autem crux de aqua fit, et in toto et in partibus, ut ostendatur et
universam Ecclesiam Christi et singulas Ecclesias per lavacrum aquae et
fidem passionis a peccatorum sordibus esse mundatas.
|
|
