|
Laudes Matutinae noctis partem sibi vindicant ultimam, quartam videlicet
vigiliam, quae usque ad solis ortum protenditur. In hoc officio quasi
reperta salutis via unica, Domino laudes multipliciter decantamus. Nec
jam tres tantum psalmos, sicut in tribus praedictis nocturnis, et in
diurnis officiis, nos tribus quae restabant horis Dei servitio
praesentamus et offerimus, sed coram ipso corda nostra effundentes,
Redemptori nostro undique laudes colligimus. Primo ei decantamus psalmum
Dominus regnavit (Psal. XCII). In quo Christus miranda brevitate
multipliciter laudatur. Primo loco a pulchritudine, secundo a
fortitudine, tertio ab operibus, quarto a ptante [f., potestate]; quinto
a laudibus universitatis, sexto a veritate dictorum, septimo a
sanctitate propriae domus. Quae omnia diligens lector in eodem psalmo
notare poterit, et in expositionibus sanctorum invenire. Sequitur
psalmus Jubilate Domino, omnis terra (Psal. XCIX). Qui non jam angulum
terrae invitat ad laudem, sed sicut ubique seminata est benedictio, ita
undique exigit jubilationem. Unde et titulus ejus habet: Psalmus in
confessione. Tertius psalmus est Deus, Deus meus (Psal., LXII) ad laudem
resurrectionis pertinens. Ubi dicitur, ad te de luce vigilo, ipso
scilicet diluculo quando Christus surrexit. Tunc enim enixius orandum
est, quando Christus resurgens spem resurgendi mortalibus dedit. In fine
dicitur: Obstructum est os loquentium iniqua (ibid.). Quod maxime in
resurrectione factum est, quia tunc omnis ambiguitas calcata est. Sed
quia resurrectio Christi credere eam nolentibus inutilis est,
consequenter adjungitur psalmus Deus misereatur nostri (Psal. LXVI); in
quo oramus ut collata nobis beneficia per Christum cognoscamus. Nec
minus idem psalmus ad laudem invitat ibi. Confiteamur tibi populi, Deus,
et repetit, Confiteantur tibi populi omnes (ibid.). Continuantur autem
hic psalmi duo et postea tres, videlicet Laudate Dominum de coelis
(Psal. CXLVIII), et duo sequentes, non interponendo, Gloria Patri, ut
juxta sensuum nostrorum numerum quasi quinque psalmi computentur in hoc
officio, ut qui eos Domino decantaverunt, seipsos in omnibus sensibus
suis Deo offerre significentur. Quod hymnus Zachariae, Benedictus
Dominus Deus Israel (Luc. I), etc., ad hoc officium in quo de
redemptione nostra exsultatur spiritualiter pertineat, ipsius hymni
continentia declarat. In diebus profestis loco psalmi in hoc officio
primi cantatur poenitentialis psalmus Miserere mei, Deus (Psal. L), quia
dies illi dies poenitentiae sunt, festivitates sanctorum, dies
laetitiae. Loco cantici trium puerorum ponitur aliud canticum juxta
varietatem dierum. Illud enim instinctu laetitiae omnia elementa et
universas creaturas vocat ad laudem; hoc beneficia Dei miserentis
reducit ad memoriam ut poenitentes non desperent.
|
|
