|
Qui pridie quam pateretur, etc. Ad haec verba potentia et efficacia,
sicut scriptum est: Ecce dabit voci suae vocem virtutis (Psal. CLXVII).
Ad haec, inquam, verba, Hoc est corpus meum, fit super omnem humanam
rationem divina virtute, humana sollicitudine, de cibo corporis, esca
spiritualis; et descendente super panem et vinum immensae majestatis
virtute, tam veram divinitatem et humanitatem Christi in coelo regnantis
accipimus, quam veram substantiam ignis a sole supposita crystalli
sphaera exigua mutuare possumus. Solae manus Christi tornatiles, aureae,
plenae hyacynthis (Cant. V), ejus qui dicit: Sine me nihil potestis
facere (Joan. XV). Haec operantur per manus sacerdotis, quae manibus
suis conformatae sunt maximae, quia ut haec operari cum ipso et per
ipsum et cum ipso possint, oleo sacro consignatae sunt. Tam sacram
igitur hostiam super invisibile fidei altare offerens sacerdos, non jam
ut prius timide loquitur, neque hostiam nominat servitutis, sed cum
exsultatione et laetitia spirituali dicit: Praeclarae majestati tuae
offerimus de tuis donis quae videlicet nobis dedisti ad corporis
sustentationem, ac datis, quae scilicet tibi sacrificando dedimus. Haec
enim virtute tua in corpus et sanguinem Filii tui consecramus, Hostiam
puram et purificantem, sanctam, et sanctificantem, immaculatam et
immaculatos efficientem, id est panem sanctae vitae, non temporalis, non
animalis, sed spiritualis et aeternae, et calicem qui in perpetuum
salvare et satiare potest, et ideo salutis aeternae. Notandum quod
consignatio facta super panem et calicem ante consecrationem quasi
oratio est ut consecratio compleatur; post consecrationem vero iterata
consignatio, consecrationis jam adimpletae quaedam est testificatio.
Illud quoque praetermittendum non est quod in hoc Capitulo sancta
Ecclesia misericordiae Domini tria proponit insignia, scilicet beatam
passionem, ab inferis resurrectionem; et in coelos gloriosam
ascensionem. Primum vulnerat Ecclesiam charitate, alterum confortat
fide, tertium laetificat spe. Primo conformari nos oportet in Actione
prima; secundo in Actione secunda, mysterium fidei cum devotione precum
offerendo; tertio in tertia, Christum Dominum in dextera Patris gloria
et honore coronatum contemplando. Dicit enim: Hoc facite in meam
commemorationem (Luc. XXII).
|
|
