|
Et ut ostendat sacerdos qualiter per Christum gloria Trinitati sit
acquisita in mentibus fidelium, quantum potest exprimit passionis
mysterium. Post signa crucis utraque manu elevat sacramentum corporis et
sanguinis Christi, et paulo post deponit; quod significat elevationem
corporis Jesu Christi in cruce, et ejusdem in sepulcrum depositionem.
Unde et calicem corporali palla tegit, quod significat sindonis
involutionem. Cum igitur calix hucusque pro cautela coopertus fuerit hoc
pro mysterio cooperitur. Interdum sacerdos ad Dominicam Orationem
accedens, ut praesente magistro petitiones quas ipse facere docuit,
meliorem sortiatur effectum praemittit, Divina institutione formati quia
Matthaeo et Luca testantibus, sic orare Christus instituit. Competenter
autem subjungit Audemus dicere. Nisi enim Christus instituisset qualiter
homo, terram et lutum se esse cognoscens, Deum Patrem suum nominare
auderet? Notandum quod in Oratione Dominica VII sunt petitiones omnia
quae petenda sunt continentes. In cujus expositione multa a sanctis
Patribus dicta leguntur; sed quia mens orantis tot ea hora capere non
potest, nos de singulis petitionibus pauca dicere volumus, ut qui orat
intelligere possit quid petat, et intelligens devotior fiat. Ad hoc enim
orando verba proferimus, ut nobis affectum devotionis excitemus non ut
Deum qui omnia novit quod nostra postulet mens doceamus.
|
|
