|
Congrue autem pax datur ante communionem, quia quicunque prius fratri
non reconciliatus communicare praesumpserit, judicium sibi manducat et
et bibit (I Cor. XI). Agnus Dei ter cantatur, ut verus Agnus cujus
carnem et sanguinem sumimus nobis propitietur. Primo rogamus ut nobis
misereatur, peccata relaxando; secundo ut nobis misereatur, devotos sibi
faciendo; tertio, ut nobis pacem donare dignetur: quae hic initium habet
in sanctis et in beata vita perficietur. Haec tria tres praemissae
postulant Actiones. In hujus pacis signum sacerdos prius osculum
porrigit diacono, et diaconus subdiacono: et ille caeteris. Quia
Christus pacem mundo attulit, quam primo majoribus, scilicet apostolis,
deinde per eos minoribus nuntiavit. Unde Suscipiant montes pacem populo
(Psal. LXXI).
|
|
