|
Psalmi et Lectiones et Responsoria diebus festis sub tribus
distinctionibus cantantur. Quartam faciunt laudes Matutinae; Tres
priores Nocturni, sive vigiliae, more Romano nuncupantur. Siquidem nox
in quatuor vigilias antiquo more dividitur. Quarum prima conticinium
dicitur, secunda intempestum, tertia gallicinium, quarta antelucanum.
Unaquaeque autem tribus horis contenta est. Unde et trium nocturnorum
singulum tres habet psalmos quibus nos totidem horis noctis Dei servitio
praesentamus. Juxta numerum psalmorum Lectiones recitantur, quia in
singulis Horis praesertim noctis contra spirituales nequitias muniendi
sumus. In festis minoribus retento numero psalmorum propter idem,
minuitur numerus lectionum ad tollendum fastidium, quod in eis rebus
praecipue vitandum est in quibus solum acceptatur desiderium. In diebus
profestis, quando videlicet nulla sanctorum occurrit festivitas, psalmi
combinantur, et quasi sex psalmi per Gloria Patri distinguuntur, ut et
psalterii lectio in singulis perficiatur hebdomadibus et numeri
mysterium conservetur. Sex enim psalmi, imo sex psalmorum combinationes,
ad sex aetates mundi, sive ad sex vitae nostrae dies referuntur, quibus
anima et corpore propter Sabbatum VII aetate et VII die designatum, in
Dei servitio laborandum est. Quidam aliud assignant mysterium ubi sub
tribus distinctionibus nocturnum celebratur officium. Nox enim ad quam
pertinet hujusmodi officium, huic saeculo tenebris ignorantiae pleno
comparatur. Secundum autem hoc est spatium, quod cum mundo incoepit, et
usque ad communem resurrectionem durabit, tria complectitur tempora,
videlicet tempus ante legem, tempus sub lege, tempus gratiae. Haec tria
tempora triplici Nocturno exprimuntur. Qui enim ante legem, et qui sub
lege fuerunt, nondum vera redemptione inventa, diversa Deo sacrificia
pro expiatione peccatorum offerebant sicut Levitici liber ostendit. Haec
diversa sacrificia Deo oblata exprimimus, dummodo psalmos, modo
Lectiones, modo Responsoria cantamus. Quorum psalmus quilibet a pluribus
cantatur, lectio ab uno tantum, Responsorium modo ab uno, modo a
pluribus. Quia et sacrificia quaedam populi multitudo offerebat, quaedam
vero solus sacerdos, quaedam sacerdos cum populo. Tertium Nocturnum
exprimit tempus primitivae Ecclesiae, in quo et Judaei et gentiles in
Christum credentes, quia veram hostiam nesciebant, diversa adhuc
sacrificia offerebant, vel offerenda mente judicabant. In quorum persona
sicut et priorum dicit Psalmista: Quandiu ponam concilia in anima mea?
(Psal. XII.) Siquidem diversa concilia quaerebant, quia unicum non
invenerant. Postea vero Ecclesia per vicos et plateas civitatis quaerens
quem diligit anima ejus, invenit unicum consilium, unicam vitae viam,
Christum (Cant. III). Quod nos post tertium Nocturnum exprimimus
exclamando Te Deum laudamus, etc. Hoc officium secundum usum monachorum.
Oratione sicut caetera terminatur. In quo primariam servare videntur
institutionem. Nostra autem consuetudo humanae infirmitati parcens et
labori, officio praedicto laudes Matutinas continuat, et Oratione una
duo claudit officia.
|
|
