|
In quarta feria quartae hebdomadae quadragesimae solemne scrutinium
celebratur quod est iter ad baptismum. In hac baptizandi catechizantur.
Catechismus autem duplicem continet instructionem, scilicet de fide et
de moribus. Unde in missa prima Lectione, quae secundum Ezechielem
legitur, monstratur quomodo catechumenos congreget. Deus ad compagem
corporis Christi, eripiens a priore vita, et faciens credere in
Christum. Sic enim legitur ibi: Tollam vos de gentibus et congregabo vos
de universis terris, et adducam vos in terram vestram, et effundam super
vos aquam mundam, et mundabimini ab omnibus inquinamentis vestris, et ab
universis idolis vestris mundabo vos; et dabo vobis cor novum, etc.
(Ezech. XXXVI). Quod Hieronymus sic super eumdem Ezechielem exponit:
Creator enim omnium sum, peperci eis et sanctificavi illos, et gloriae
pristinae restitui, ita ut super credentes et ab errore conversos
effunderem aquam mundam baptismi salutaris et mundarem eos ab omnibus
abominationibus suis, et ab universis erroribus suis quibus fuerant
occupati, et darem eis cor novum ut crederent in Filium Dei. Sic igitur
prima Lectio de fide agit. Cui concordat Responsorium: Venite, filii,
audite me (Psal. XXXIII). At secunda Lectio de moribus disputat, in qua
dicitur: Quiescite agere perverse, discite benefacere, quaerite
judicium, subvenite oppresso (Isa. I). Et in conclusione ita: Et venite
et arguite me, dicit Dominus (Ibid.). Quod est, si ita feceritis et non
reddidero vobis mercedem, merito me arguetis. Sequens Responsorium
demonstrat catechumenos ad nomen Christianum debere transire. Beata
gens, cujus est Dominus Deus ejus, populus quem elegit in haereditatem
sibi (Psal. XXXII). Versus bonos mores electorum demonstrat. Verbo
Domini coeli facti sunt, et spiritu oris ejus omnis virtus eorum
(ibid.). Evangelium non dissonat ab hoc officio, dicente Augustino super
Joannem: Lavit ergo caecus oculos in ea piscina quae interpretatur
missus; baptizatus est in Christo. Si ergo quando cum in seipso
quodammodo baptizavit tunc illuminavit, quando inunxit oculos fortasse
catechumenum fecit. Hoc autem officium quarta feria quartae hebdomadae
ideo celebratur, ut quarta saeculi aetas ad memoriam revocetur. Quarta
saeculi aetas, sicut Beda in Chronica sua testatur fuit a David usque ad
transmigrationem. Illa aetas regno David et Salomonis inclyta nostram in
Christo gloriam praefiguravit. In illa etiam nostrae gloriae promissio
facta est, dicente Domino ad David: De fructu ventris tui ponam super
sedem tuam (Psal. CXXXI). In illa constructio templi de marmore et de
lapidibus pretiosis constitutionem praesignavit Ecclesiae de universis
gentibus per Christum congregatae. Merito etiam quarta feria quartae
hebdomadae celebratur scrutinium, et de fide et de moribus instruuntur
baptizandi in sancto Sabbato Paschae, quia et quarta aetas hominis
laboribus apta est. Eos autem qui ad servitium Dei accedere volunt
laboribus insistere oportet. Unde Salomon: Fili, accedens ad servitutem
Dei, sta in timore, et praepara animam tuam ad tentationem (Eccli. II).
A die praenominata usque ad Sabbatum ante ramos Palmarum, nulla est
ostendenda varietas.
|
|
