|
Nocte praefata Lectiones quatuor leguntur ad missam. Catechumeni namque
ad mensam Domini vocantur, id est, ad sanctam Scripturam, quae per
mensam quatuor pedum in tabernaculo Domini positam significata est.
Siquidem quatuor mensae pedes sunt quatuor expositiones sacrae
Scripturae, scilicet historica, allegorica, moralis, anagogica. In
quatuor hujus noctis Lectionibus haec quatuor, si subtiliter inspexeris,
poteris invenire. Prima secundum historiam nostrae recolit creationis
dignitatem. A qua quoniam peccando cecidimus, non sequitur canticum.
Secunda lectio secundum allegoriam agit de liberatione nostra ab exsilio
in quod per peccatum devenimus. Agit namque de liberatione populi Israel
ab Aegypto, in qua nostra liberatio a spirituali Aegypto praesignata
est. Tertia Lectio moralis est: Apprehendent septem mulieres virum unum
in die illa, etc. (Isai. IV). Septem enim mulieres, septem gratiae sunt
quae spiritualiter dicuntur dona Spiritus sancti. Unde et septiformis
Spiritus appellatur. De ablutione etiam sordium agit eadem Lectio, quod
totum ad mores pertinet. Et est rectus ordo ut postquam instructi
fuerint de purgatione baptismi, instruantur de moribus. Quarta Lectio
dicit: Audite audientes me, et comedite bonum, et delectabitur in
crassitudine anima vestra (Isa. IV). Quod ita Hieronymus super Isaiam
exponit. Sermo divinus non carnis bona, sed animae pollicetur. Haec
igitur Lectio anagogen sapit, quia sub nominibus carnalium promittit
bona coelestia. Unde Beda: Anagoge est sensus ad superiora ducens, id
est locutio quae de praemiis futuris et ea quae in coelis est vita
futura sive mysticis sive apertis sermonibus disputat. Audiamus quid
dicant catechumeni post admonitionem doctoris. Sicut servus desiderat,
etc. (Psal. XLI). Unde Augustinus: Et quidem non male intelligitur vocem
eorum esse qui cum sint catechumeni ad gratiam sancti lavacri festinant.
|
|
