|
Ab octavis Pentecostes usque ad Septuagesimam in Dominicis et festis
diebus Responsorium et Alleluia actionem eorum et laetitiam sive laudem
sive gratiarum actiones significant qui perseverant in sanctitate, quam
in baptismo receperunt. Ita enim in spe jam habent regnum futurum ut
inter laboriosa opera Deo gratias agant. Sive ut alii dicunt, per
Responsorium activam intelligimus per Alleluia contemplativam.
Instruendi sunt homines de bonis activae, quae sunt eleemosyna, lectio,
visitatio infirmorum, et hujusmodi. Instruendi sunt etiam de bonis
contemplativis, quae sunt consideratio aeternorum, laus Dei. In illis
autem diebus, qui sunt a Sabbato paschali usque ad octavas Pentecostes,
non canitur Responsorium quia tempus illud nostram praefigurat
resurrectionem, quando omnes erunt docibiles Dei, et omnia activae vitae
opera cessabunt; sed tantum Alleluia cantabitur, id est laetitia
animarum de percepta immortalitate et receptione corporum agetur. Eamdem
laetitiam numerus quinquagenarius significat, qui apud Haebraeos
Jubileus appellatur.
|
|
