|
Cum celebratur Adventus Domini et in tempore quadragesimali, Gloria in
excelsis Deo et Te Deum non cantamus in ecclesia, dalmatica et vestis
subdiaconalis non portantur. Haec enim omnia praetendunt laetitiam.
Tempus autem Adventus ad memoriam reducit tempus illud quo Messias
exspectabatur, et de tanta adventus ejus dilatione vivi conquerebantur
et mortui qui in inferno tenebantur. Tempus vero Quadragesimae ab ipsa
Septuagesima nostram commemorat captivitatem, qua genus humanum a
paradiso expulsum sub diabolo principe exsulabat, donec per Jesum
sacerdotem magnum in hujus redemptionis nostrae figura reductus est in
Jerusalem. Quia ergo utrumque tempus moeroris est, in utroque ab eis
quae laetitiam praeferunt abstinemus; non tamen aequaliter, quia in
Quadragesima prorsus Alleluia tacetur, quod non fit tempore Adventus.
Denique haec cuncta praedictis temporibus ideo intermittuntur, ut in
Nativitate Domini et die Resurrectionis festivius amplectantur, et ut
Novi Testamenti gratia praestantior Veteri cognoscatur. Quoties non
dicitur ad missam Gloria in excelsis, toties tacetur Ite missa est, quia
tempore luctus et poenitentiae magis oportet in Ecclesia miserias
commemorare, peccata deflere et Deum gratiae auctorem benedicere. Unde
et in fine missae dicitur Benedicamus Domino, quasi per quem a praesenti
miseria speramus liberari.
|
|
