|
Ordo consideratur, alius in disciplinis, ut si dixerim grammaticam
dialectica antiquiorem, vel arithmeticam priorem musica. Alius in
libris, ut si dixero Catilinarium Jugurthino priorem. Alius in
narratione, quae est in continua serie. Alius in dispositione. Ordo in
disciplinis attenditur secundum naturam; in libris secundum personam
auctoris, vel subjectam materiam. In narratione secundum dispositionem,
quae duplex est: naturalis, scilicet quando res eo refertur ordine qua
gesta est; et artificialis, id est, quando id quod postea gestum est
prius narratur: et quod prius, postmodum dicitur. In expositione
consideratur ordo secundum inquisitionem. Expositio tria continet:
litteram, sensum, sententiam. Littera est congrua ordinatio dictionum,
quam etiam constructionem vocamus. Sensus est facilis quaedam et aperta
significatio, quam littera prima fronte praefert. Sententia est
profundior intelligentia, quae nisi expositione vel interpretatione non
invenitur. In his ordo est, ut primum littera, deinde sensus, deinde
sententia inquiratur: quo facto, perfecta est expositio.
|
|
