|
Et vidi quod hoc quoque esset vanitas. Risum reputavi errorem et gaudio
dixi: Quid frustra deciperis? Quanta autem vanitas in deliciis carnis
sit, me supra dixisse memini. Unde reliqua quae sequuntur consideranda
nobis sunt, quia et ipsa licet plana per se videantur, habent tamen
fortasse aliquid quod diligens investigatio adjicere possit. Ait ergo:
Risum reputavi errorem et gaudio dixi: Frustra deciperis? Cunctis liquet
quod per risum quodammodo concepta laetitia foras trahitur, et quod de
gaudio intus latuit, ruptis velut modestiae claustris, quadam levitate
et incontinentia lubricae mentis propalatur. Et idcirco recte risus
error dicitur; quia cum mens gaudium suum per ineptam laetitiam foras
fundit, quasi ad sinistram pergens rectum iter, quo in Deum gaudendo
pergere debuerat, derelinquit. Sed sciendum est quod spiritale gaudium
nequaquam animum ad risum dissolvit; sed ea tantum laetitia quae a
carnis blandimento concipitur etiam per carnis motum facile aperitur.
Nam quia primum ad animum ingrediendo inordinatum gaudium claustra
continentiae rupit: eadem postmodum via qua illapsum est, cum introrsum
excrescere coeperit, sine modestia facile erumpit. Lubrica enim mens
semen perversum, quod primum sine modestia concipit, quasi parturiens
postmodum sine pudicitia, effundit; nec se continere potest, quin
excrescentem intus laetitiam ejiciat, cujus integritatis claustra rupta
sunt, quando eam concipiebat. Primum ergo decipitur, quando blandientis
mundi illecebras intro ad gaudium suscipit; postea errat, quando
conceptum introrsum gaudium ad lasciviam mundi per risum foras effundit.
Notandum quod gaudium tantum arguitur, risus vero omnino reprobatur;
quia risus omnimodo malus est: gaudium non semper malum est, nisi quando
de malo est; et idcirco illum reprobat, hoc castigat, quatenus et id
quod prorsus malum est caveatur, et id quod bonum esse potest
corrigatur. Propterea, inquit: Risum reputavi errorem et gaudio dixi:
Quid frustra deciperis? Decipitur ergo, cum delectatur in rebus noxiis;
et bene sibi esse putat, cum male est. Decipitur etiam cum praesentium
occupatione delectationum involvitur, et ne futura mala considerare
valeat, praepeditur.
|
|
