|
Quaeritur etiam quando, et ubi, et qualis creata sit materia rerum; sed
constat quod in principio temporum ante omnem diem, ita scilicet ut
simul coeperint tempus, et materia, et in eodem tempore angelus; de qua
re dictum est: Prima omnium creata est sapientia, non ante mundi
constitutionem, sicut quidam Graeci existimaverunt cui sententiae
alludens Hieronymus dicit: Quis novit quot annis aut lustris ante mundum
angeli laudaverunt Creatorem suum? Et consimile Salomon dicit in quodam
loco: Quis novit, an spiritus jumentorum feratur inferius, hominum
superius? (Eccl. I, III.) Neuter tamen ponit hoc pro sententia, quod in
quaestione proponit. Propterea dicimus simul creata esse tempus et
materiam, quia tempus non est aliud nisi mutabilitatis successio, quae
cum mutabili materia coepit esse; ubi autem formata modo consistit,
ibidem creditur prius creata, implens etiam tunc eamdem capacitatem
localem quam modo implet. Creata est autem informis, non ex toto carens
forma; sed ad comparationem sequentis pulchritudinis et ordinis,
informis potest dici. Terra autem erat in medio, habens in se alveos et
venas, receptacula scilicet aquarum, tam super terram quam intra eam
labentium. Tria vero reliqua elementa confusa in unum ad modum spissae
nebulae ferebantur super terram ex omni parte ac superficie terrae,
usque ad empyrium summum: et ideo nomine terrae appellantur, ubi dicit:
Creavit Deus coelum, et terram (Gen. I).
|
|
