|
Sanctificabisque et pectusculum consecratum et armum. Hucusque quae
dicit ad praesentem pertinent consecrationem Aaron et filiorum ejus,
quae vero sequuntur, ad futuram deinceps consuetudinem, ut scilicet,
quia sacerdotes in consecratione sua de pacificis suis obtulerunt pectus
et armum, haec eadem accipiant a filiis Israel de pacificis eorum lege
perpetua. Sanctificabis, id est confirmabis, et nota quod primus aries
fuit oblatus in holocaustum. Secundus in pacifica. Unde Dominus habuit
suam partem armum et adipem: et Moyses qui obtulit pectus; Aaron cujus
erat oblatio, reliquas carnes quas cepit, et comedit cum filiis suis in
atrio tabernaculi, sicut deinceps facturi erant filii Israel. Et erit
Sanctum sanctorum, id est sanctum ad sanctas hostias sacrificandas.
|
|
