|
Accipe, charissime frater, Excerptionum munus quod postulasti. Invenies
in eo multa ex multis libris collecta, in unam seriem ordinate
disposita, sibi prout ratio sensuum postulat cohaerentia, continuata et
connexa, dilectionis tuae studio satis utilia. Sacrorum namque librorum
fertiles agros pervolantes, et ex eis optima quaeque colligentes, pauca
vel nulla simplicitati tuae sacrae Scripturae lectionem ingredienti
necessaria praetermittimus. Per haec autem, quae scribimus, nec
grammaticos docere, nec sapientes volumus erudire, sed tuae petitioni,
tuo desiderio volumus satisfacere, tuumque studium in melius adjuvare.
Sed et hoc tibi notum esse volumus, quod de his, quae tibi scribimus,
nobis gloriam non damus, sed Deo, et sanctis doctoribus, ex quorum
libris ea sumpsimus, licet multa ponamus, quae proprio sensu
cogitavimus, propriis verbis dictavimus. Modum scribendi talem servamus.
Totam schedulae hujus seriem in duas partes dividimus. In prima parte
materiam habemus originem artium, situm terrarum, cursum historiarum ab
initio usque ad nos decurrentium. In secunda parte materiam habemus
sensus allegoriarum, et tropologiarum secundum subjacentis lineam
historiae dispositarum. Primam partem per decem libros distinguimus. In
primo libro de origine artium, et divisione earum breviter disputamus.
In secundo materiam mundanae et divinae Scripturae, et quomodo mundana
divinae subserviat demonstramus cum quorumdam adjectione. In tertio
situm terrarum describimus. In quarto summam historiae divinae ab initio
usque ad nativitatem Christi ponimus. In quinto ortum, cursum et occasum
regnorum mundi a tempore, quo ab initio esse coeperunt, usque ad
nativitatem Christi. In sexto tractamus de imperatoribus Romanis ab
Octaviano [Octavio] usque ad Trajanum. In septimo a Trajano usque ad
Constantinum Magnum. In octavo a Constantino Magno usque ad Zenonem. In
nono a Zenone usque ad Carolum Magnum. In decimo tractamus de origine,
et regibus Francorum usque ad Carolum, et post, a Carolo usque ad nos.
Secundam vero partem operis hujus per quatuordecim libros dividimus.
Primus liber tractat de mysteriis rerum gestarum ab initio usque ad
Abraham. Secundus de mysteriis rerum gestarum ab Abraham usque ad
Moysen. Tertius de mysteriis rerum gestarum a Moyse usque ad Josue.
Quartus de mysteriis rerum gestarum a Josue usque ad Elcanam patrem
Samuelis. Quintus de mysteriis rerum gestarum ab Elcana usque ad David,
ubi scriptum est: Scidit Dominus regnum Israel a te hodie, et tradidit
illud proximo tuo meliori te (I Reg. XV). Sextus de mysteriis rerum
gestarum a David usque ad Salomonem. Septimus de mysteriis rerum
gestarum a Salomone usque ad transmigrationem Babylonis. Octavus de
mysteriis rerum gestarum quae continentur in Esdra. Nonus de mysteriis
rerum gestarum, quae continentur in libris Esther, Tobiae et Judith.
Decimus sermones diversos singulos de materia sua editos. Caetera, quae
deinceps ponimus, de Novo Testamento sumimus quatuorque libris
determinamus. Sicque totum opus viginti quatuor libris consumamus. Quod
vero in singulis capitulis brevitati studemus. Ideo facimus ne
imperfectionem inchoationis tuae verbis prolixioribus oneremus. Primae
autem partis libros et capitula taliter in sequentibus ordinamus.
|
|
