|
Magica sub philosophia non continetur, sed est foris, falsa professione
de vero mentiens, et veraciter laedens, homines seducit a religione
divina, culturam daemonum suadet, et ad omne nefas suos sequaces
impellit. Haec quinque genera maleficiorum continet, manticem,
mathematicam, maleficia, sortilegia, praestigia. Mantice interpretatur
divinatio. Haec quinque species habet, necromantiam, geomantiam,
hydromantiam, aeromantiam, pyromantiam. Prima fit in mortuis, secunda in
terra, tertia in aqua, quarta in aere, quinta in igne. Mathematica in
multis est vanitas. Haec tres habet species, Haruspicinam (aruspicinam),
augurium, horoscopicam. Haruspicina dicitur ab inspectione hararum
(ararum), haec fit quando in fibris animalium, quae animalia in haris,
id est cubilibus ponuntur, facta quaeruntur. Augurium dictum est ab
avibus, hoc aliquando pertinet ad aures, et dicitur augurium ab avium
garritu, aliquando ad oculos, et dicitur auspicium ab avium
inspectatione. Horoscopica in constellationibus constat, maleficia fiunt
per incantationes; sortilegia, per sortes; praestigia, per phantasticas
illusiones. Magicam Zoroastres rex Bactrianorum invenit, et post longa
tempora Democritus ampliavit. Hydromantiam Persae feruntur invenisse.
Auguria Phriges; Praestigia Mercutius. Aruspicinam quidam puer
Hetruscus, nomine Tages .
|
|
