|
Propter autem ista tria remedia inventa est omnis ars, et omnis
disciplina. Propter inveniendam namque sapientiam, inventa est theorica;
propter invemendam virtutem, inventa est practica; propter inveniendam
necessitatem, inventa est mechanica. Theorica ignorantiam expellens
sapientiam illuminat. Practica vitium excludens virtutem roborat.
Mechanica penuriam cavens vitae praesentis defectum temperat. Theorica
in omni quod est et non est, verum scrutari eligit. Practica modum
vivendi recte et disciplinae formam secundum virtutum institutionem
disponit. Mechanica, res defluentes administrans, humano corpori
necessaria providere satagit. Omnium enim humanarum actionum seu
studiorum, quae ratio moderatur, finis et intentio ad hoc spectare
debet, ut vel naturae nostrae reparetur integritas, vel defectuum,
quibus praesens subjacet vita, temperetur necessitas. Reparatur autem
naturae nostrae integritas sapientia, ad quam pertinet theorica, et
virtute, ad quam pertinet practica, et temperatur necessitas
administratione temporalium ad quam pertinet mechanica. Novissima autem
omnium inventa est logica causa eloquentiae, ut sapientes, qui
praedictas principales disciplinas investigarent et unirent, rectius,
veracius, honestius illas tractare, et disserere de illis scirent:
rectius per grammaticam, veracius per dialecticam, honestius per
rhetoricam. Logica namque facundiae rectitudine veritatem, venustatem
administrat. Theorica interpretatur contemplativa; practica, activa,
mechanica, adulterina; logica, sermocinalis .
|
|
