|
Quatuor sunt itaque species mathematicae: arithmetica, musica,
geometria, astronomia. Arithmetica tractat de numero, musica de sonorum
proportione, geometria de locorum spatio, astronomia de astrorum motu.
Elementum arithmeticae est unitas. Elementum musicae est unisonum.
Elementum geometriae est punctum. Elementum astronomiae est instans.
Arithmetica est numerorum scientia. Musica est plurium sonorum
dissimilium in unum redactorum concordia. Geometria est disciplina
magnitudinis immobilis, formarumque descriptio contemplativa, per quam
uniuscujusque rei termini declarari solent. Astronomia est disciplina
magnitudinis mobilis, et investigans spatia, motus, et reditus
coelestium corporum certis temporibus .
|
|
