|
Francorum itaque gens Marcomire mortuo Pharamundum sibi regem
constituit. Pharamundo deinde Clodio successit, qui Cameracum cepit, et
inde Romanos ejiciens, usque ad Somonam fluvium dilatavit limitem suae
dominationis. Post Clodionem regnavit Meroveus, a quo Merovungi
vocabantur, qui nunc Franci dicuntur. Post Meroveum regnavit
Childericus, et post Childericum Clodoveus. Porro Clodoveus Clotildem,
christianissimam puellam et valde speciosam Childerici quondam
Burgundiae ducis filiam, duxit uxorem.
|
|
