CAP IV. Quod scriptura mundana subserviat divinae.

Omnes itaque artes subserviunt divinae sapientiae, et inferior scientia recte ordinata ad superiorem conducit. Sub eo igitur sensu qui inter voces et res versatur, continetur historia, et ei subserviunt tres scientiae, dialectica, rhetorica, grammatica. Et sub eo sensu qui inter res et facta mystica versatur, continetur allegoria. Et sub illo qui est inter res et facienda mystica, continetur tropologia. Et his duabus subserviunt arithmetica, musica, geometria, astronomia et physica.