|
Sed quid est quod hic dicitur Deus ab omni opere requievisse, cum
Christus in Evangelio dicat: Pater meus usque modo operatur, et ego
operor? (Joan. V). Sciendum est itaque quod operatio Dei quadrifariam
discernitur. Primum opus Dei est opus conditionis, secundum opus
dispositionis, tertium opus propagationis, quartum opus gubernationis.
Primum fecit Deus ante omnem diem secundum in sex diebus et ab hoc in
septimo die requievit; tertium a principio usque ad finem saeculi facit,
quartum in aeternum facere non cessabit. Taliter accedit sacra Scriptura
per opus conditionis ad materiam suam, id est ad opus restaurationis, de
qua materia tripliciter tractat, sicut supradictum est, secundum
historiam, secundum allegoriam, secundum tropologiam. Sed priusquam
narrationem historicam ingrediamur, oportet ut de situ terrarum nonnulla
dicamus. Primum namque summam historiae non solum divinae, sed et
mundanae perstringere proponimus, ac deinceps mysteria allegoriae et
tropologiae pro posse nostro declarabimus.
|
|
