|
Omnis divina Scriptura in duobus Testamentis continetur, Veteri
videlicet et Novo. Utrumque Testamentum tribus ordinibus distinguitur,
Vetus Testamentum continet legem, et prophetas et agiographos. Novum
autem: Evangelia, Apostolos, Patres. Primus ordo Veteris Testamenti, id
est, lex quam Hebraei Torath nominant, Pentateuchum, id est quinque
libros Moysi continet hoc ordine: Primus est Bresith, id est Genesis;
secundus Hessesmot, id est Exodus; tertius Vagethra, qui est Leviticus;
quartus Vagedaber, qui est Numeri; quintus Adabarim, qui est
Deuteronomion. Secundus ordo est Prophetarum. Hic continet octo
volumina: Primum, Josue Hennum, id est filium, Num, qui et Josue, et
Jesus Nave, et Jesus nuncupatur; secundum, Soptim, qui est liber
Judicum; tertium, Samuel, qui est primus et secundus Regum; quartum,
Malachim, qui est tertius et quartus Regum; quintum, Isaiam; sextum,
Jeremiam; septimum, Ezechielem; octavum, Thareastra, qui est liber
duodecim prophetarum. Tertius ordo est agiographorum. Hic continet novem
libros. Primus est Job; secundus Psalterium; tertius Maslot, qui Graece
Parabolae, Latine Proverbia sonat; quartus Celeth, qui est Ecclesiastes;
quintus Sira sirim, id est Cantica canticorum; sextus Daniel; septimus
Dabreniamin, qui est Paralipomenon; octavus Esdras; nonus Esther. Omnes
vero numero viginti quatuor. Sunt praeterea et alii libri, ut Sapientia
Salomonis, liber Jesu filii Sirach, et liber Judith, et Tobias, liber
Machabaeorum, qui leguntur quidem, sed non scribuntur in Canone. His
libris viginti duobus Veteris Testamenti octo adduntur Novi. In primo
ordine Novi Testamenti sunt quatuor Evangelia, quae scripserunt
Matthaeus, Marcus, Lucas, Joannes. In secundo similiter quatuor, Actus
apostolorum, Epistolae Pauli numero quatuordecim sub uno volumine,
canonicae Epistolae, Apocalypsis. In tertio ordine primum locum obtinent
decreta, quae canones appellamus; deinde sanctorum Patrum scripta, id
est Hieronymi, Augustini, Gregorii, et aliorum, quae infinita sunt. Haec
tamen scripta Patrum in textu divinarum Scripturarum non computantur,
quemadmodum in Veteri Testamento, ut diximus, quidam libri sunt, qui non
scribuntur in Canone, et tamen leguntur, ut Sapientia Salomonis, et
caeteri dicti. Textus ergo divinarum Scripturarum quasi totum corpus,
principaliter triginta libris continetur. Horum viginti duo, sicut supra
diximus in Veteri Testamento, et octo continentur in Novo.
|
|
