|
Claudius, vir strenuus et moribus probus, imperator creatus, Gothos, jam
per annos quindecim Illyricum Macedoniamque vastantes, magna strage
coercuit. Unde illi in curia clypeus aureus, et statua simul equestris
erecta est. His diebus Paulus quidam haereticus indigna de Christo
sentiens praedicabat eum hominem communis naturae fuisse, et de terra
initium sumpsisse. Verum Claudio imperatore defuncto, Quintilius frater
ejus ab exercitu est electus, et in solio sublimatus, sed septimo die
imperii sui interfectus occubuit.
|
|
