|
Martianus igitur, ad imperium assumptus, imperavit cum Valentiniano
annis sex. Iste cum Parthis et Vandalis Romanum infestantibus regnum,
pacem constituit. Horum quoque imperatorum, Marciani scilicet et
Valentiniani, temporibus celebrata est Chalcedoniae quarta sancta
synodus universalis sexcentorum triginta reverendorum episcoporum,
sancti papae Leonis industria congregata. Ibi Euthices haereticus cum
Dioscoro Alexandrino episcopo abdicatus est, et damnatus. Interea
Valentinianus imperator factione Heraclii spadonis Agerium patricium
interfecit. Sed non multo post, idem Valentinianus a satellitibus Agerii
dolo Maximini comitis palatii est occisus, et mox idem Maximinus ejus
invasit imperium, ejusque uxorem in suum conjugium transire coegit.
Verum hac incontinentia non est diu gavisus. Nam post alterum mensem a
famulis regis membratim dilaniatus, et in Tiberim est projectus. Post
cujus mortem Romani Avitum Caesarem creaverunt. Porro Martianus sexto
imperii sui anno, et sexto pariter mense defunctus est.
|
|
