|
Leo Magnus post mortem Martiani assecutus imperium, imperavit annis
sexdecim. Cujus primo anno Hesperiarum imperator Avitus, intra Gallias
ab exercitu suo spretus et derelictus, ad Italiam remeavit, et post
paucos dies, honore dignitatis deposito, Placentinorum ordinatur
episcopus. Eodemque anno Majoranus a Romanis militibus apud Ravennam
Caesar Italiae est ordinatus. Qui quidem ad Hispanias abiit, et inde
contra suos ad Carthaginem transire proposuit, sed penitus spe sua
frustratus, ad Italiam est regressus, ubi tertio principatus sui anno
vix expleto decessit. Tunc Leo imperator Arthemium Caesarem in Italiam
destinavit. Qui ubi Romam attigit, Ricemerem generum suum contra Alanos
direxit, et per eum multitudinem Alanorum fugavit, et regem eorum
Beorgicum primo certaminis impetu superatum interemit. Sed non multo
post idem Arthemius, ipsius Ricemeris fraude interemptus, regnum
reliquit Olybrio. Olybrius vero non mense octavo transacto sui
principatus finem vitae dedit. Quo defuncto, Glycerius ejus sibi
praesumpsit imperium. Verum anno vix expleto, Nepos quidam nomine eum e
regno ejiciens episcopum ordinari fecit, et sibi regnum rapuit. Tantas
varietates mutationesque Romanorum principum cernens Theodoricus,
Visigothorum rex, Avernorum occupavit civitatem, contra quem Nepos
Caesar ab Italia Orestem militiae suae magistrum prodire mandavit.
Orestes autem ubi cum exercitu Ravennam venit, Augustulum imperatorem
filium suum creavit. Quod audiens Nepos, praesidio nudus ad Dalmatas
fugit, ubi et privatus defecit. Augustulo vero in Ravenna degente,
Odoacer Totilingorum rex, habens secum Herulos diversarumque auxiliarios
gentium, Italiam occupavit. Qui et Orestem interfecit, et filium ejus
Augustulum de regno pulsum in Lucullano Campaniae castello exsilii poena
damnavit. Sicque Hesperium Romanae gentis regnum, quod septingentesimo
nono urbis conditae anno primus Augustorum Octavius [Octavianus]
Augustus obtinuit, in hoc Augustulo dignitatis suae privilegium
perdidit, et in manus regum exterarum gentium tandem collapsum corruit.
Memoratus denique Visigothorum rex Theodoricus, Illyricum et partem
magnam Italiae occupavit. Porro Leo Orientis imperator Zenonem generum
suum magistrum totius Orientis fecit, et Basilicum fratrem Berinae
Augustae magistrum instituit Thraciae, Leonem vero filium suum coronavit
Augustum.
|
|
