|
Zenon igitur sumpto diademate imperavit annis duobus cum Basilico, et
quindecim solus. Porro Zeno iste Enothion composuit contra fidem
ecclesiasticam. Theodoricum quoque Visigothorum regem ad se venire
fecit, eique curam palatii sui commendavit, et non post multos dies
patriciatus honore iterum eum insignitum ad partes Italiae destinavit.
Quo dum pervenisset, Odoacrum Herulorum regem variis successibus
debellavit, et regno tandem exturbatum interfecit. Demum autem regnum
Italiae sibi praesumpsit et usurpavit. Quod ut sibi perenniter
confirmaret, filias suas vicinis regibus copulavit, dans unam Gothorum
regi Alarico, alteram regi Burgundorum Sigismundo, neptem vero suam
dedit regi Thuringorum Hermenfrido, et sororem suam Vandalorum regi
Transemundo, Clodovei quoque regis Francorum filiam suo conjunxit
matrimonio. Sessionem denique suam Ravennae constituit; homo Arianae
sectae, et bestialem contra Catholicos gerens in animo crudelitatem. Per
idem tempus facta est inventio cryptae sancti Michaelis archangeli in
monte Gargano. Mortuo autem Zenone Augusto, quidam Anastasius assumptus
ab Augusta, imperator simul, et Augustae maritus cunctis innotuit.
|
|
