|
Leontius igitur, anno Incarnationis Domini 700 imperium sumens,
imperavit annis tribus. Imperii hujus anno tertio Arabes Africam
debellabant. Contra quos direxit Joannem patritium cum stolo copioso.
Qui cum Carthaginem pervenisset, Arabes in fugam convertit, et ibidem
hiemavit. Demum ad imperatorem regressus est, volens ab eo deposcere
stolum majorem. Sed exercitus, qui in Africa remanserat, absente Joanne
patricio, elegit quemdam Absimarum, quem et nominavit Tiberium, et
creavit imperatorem. Absimarus autem, sumpto stolo qui secum erat,
navigavit ad urbem, et sine mora introivit in eam per murum
Blachernarum, et apprehendens Leontium exsilio relegavit.
|
|
