|
Absimarus igitur qui et Tiberius nominatur, imperavit annis circiter
septem. Iste Philippicum filium Nicephori in exsilium relegavit, qui
asserebat in somnis se vidisse quod caput suum obumbraretur ab aquila,
eo quod somnium hujusmodi ipsum regem futurum designare videbatur. Porro
imperante Absimaro Justinianus degens in Cersona coepit manifeste
populo, quod esset iterum suum accepturus imperium, praedicare. Qua de
re loci incolae Augusti zelo permoti, propter hujusmodi opinionem
parabant eum quasi regis insidiatorem interficere, vel comprehensum ad
eum dirigere. Sed cum hoc idem Justinianus sensisset, fugit; et Turcorum
chagano se praesentavit. Chaganus autem illum cum honore suscepit, et
tradidit ei uxorem germanam suam. Indeque navigavit ad Terebellum
Bulgariae regem, qui et ipse ei auxilium tulit, et suo imperio
restituit.
|
|
