|
Justinianus autem imperavit secundo annis sex. Qui ut imperium recepit,
omnes qui eum ante expulerant interfecit; et Absimarum, in circum
deductum et multis injuriis fatigatum, jugulari praecepit. Sed et
Gallinicum patriarcham erutis oculis Romam destinavit, et Pyrrhum
abbatem in locum ejus prorexit. Innumerabilem denique civium
multitudinem interfecit. Statuitque Cersonam ubi exsulans degerat
subvertere, et colligens omnes naves quas habere potuit, dromones,
scilicet trieres, scaphas, chimaeras, et linthres usque ad Chelandriam
eas destinavit, praecipiens omnes ibidem habitantes interfici a minimo
usque ad maximum. Quo cum pervenissent Mauritius patricius, et Elias
spatarius secundum imperatoris jussionem omnes interfecerent, exceptis
infantibus. Tuduinum civitatis principem cum aliis quadraginta
principibus ad imperatorem miserunt, et alios septem ejusdem civitatis
primores igni in ligneis verubus applicantes assaverunt. Deinde
Justinianus misit alium stolum mense Octobri, praecipiens ut omnes
pueri, qui reservati fuerant, morti traderentur. Sed ille stolus pene
totus in pelago est demersus, et perierunt ibi hominum millia
septuaginta tria. Quibus agnitis Justinianus furens adhuc magna
crudelitate misit iterum alium stolum, jubens arari, et ad pavimentum
illidi totam civitatem. Quod audientes homines illius provinciae
assumpserunt Philippicum, qui illic exsulabat, et imperatorem
creaverunt. Deinde Philippicus Constantinopolim veniens Justinianum
Augustum, et Tiberium filium ejus pariter interfecit.
|
|
