CAP. II. De Anastasio.

Anastasius igitur purpuram sumens imperavit annis viginti. Iste ab Acatio depravatus Constantinopolitano episcopo, favebat haereticis, et Catholicos persequebatur. Misit autem ad eum Hormisda papa venerabilis corripiens eum ab errore suo. Sed perfidus per legatum ipsius mandavit Anastasius: Nos jubere volumus, non juberi. Sed cum in sua perduraret perfidia, ictu fulminis interiit. Floruit per idem tempus sanctus Remigius Remorum archiepiscopus.