|
Charitas est mentis affectus, et pius amor ad Deum et proximum ferventer
et ordinate porrectus. Ejus comites sunt gratia, pax, pietas,
mansuetudo, liberalitas, misericordia, indulgentia, compassio,
benignitas, concordia.
Gratia est in qua mutuae benevolentiae alterius ad alterum affectuosus
cultus ostenditur.
Pax est concordantium in bono animorum ordinata tranquillitas.
Pietas est ex benignae mentis dulcedine gratia omnibus auxiliatrix
affectio.
Mansuetudo est per quam mansueti vel modesti tranquillitas animi,
nullius improbitate limitem suae quietis excedit.
Liberalitas est per quam liber animus in largitione possessorum nulla
tenacitate coarctatur.
Misericordia est clemens et aequalis in omnes dignatio, et in afflictos
compassibilis animi inclinatio.
Indulgentia est remissio reatus alieni ex sui consideratione descendens.
Compassio est per quam ex proximi dolore condolenti animo quaedam
afflictio generatur.
Benignitas est cum quadam splendida morum suavitate diligentis animi
fervida conspectio.
Concordia est convenientia in recto animorum indirupta quaedam et unita
complexio.
|
|
