|
Avaritia est gloriae, divitiarum, seu quarumlibet aliarum rerum
insatiabilis et inhonesta cupiditas. Ejus comites sunt philargyria,
perjurium, violentia, usura, fraus, rapina et fallacia.
Philargyria est per quam, singulari appetitu pecuniae corradendae,
continentiae frena laxantur: interpretatur enim amor argenti.
Perjurium est fraudulenta commodi consequendi aut damni devitandi
gratia, veritatis agnitae abnegatio pejerando facta.
Violentia est per quam malitia seu injuria, commodi gratia, in
inferiorem potenter et per vim exercetur.
Usura est pecuniae aut alterius rei mutuo datae cum fenore receptio.
Fraus est per quam familiari rei, inopiae vel malitiae causa,
clandestina subreptione consulitur.
Rapina est ex avidae mentis proveniens impetu violenta alienarum rerum
direptio.
Fallacia est per quam motibus deceptoriis veritas rei palliatur, vel
odium alterius, vel proprium commodum intenditur.
|
|
