Pars 21

Sequitur:

“Miror autem, quod et coelestium essentiarum primae, et tantum simul omnes supereminentes divinis illuminationibus, ut mediatae quaestiones reverenter appetunt.”

Ad hoc respicit quod dicitur summas essentias immediate a Deo illuminari, et erudiri, quia contrarium videtur, quod in hoc loco non solum a superiori suo, sed ab invicem quoque quaerentes, et quasi discere volentes inveniuntur. Sed sciendum est quod haec quaestio non doctrinae inquisitio est, sed ignorantiae professio. Quaerunt enim, ostendentes quod nesciunt, et quod doceri opus habent. Ubi autem omnes quaerunt, profecto aliunde se doceri debere ostendunt. Quaerunt ergo inter se, docendi supra se. Quia tam mutua quaestio doctrinae, et scientiae ab invicem inquisitio esse videtur, cum eas a solo superiori erudiri constet, idcirco ait. Miror quod primae illae, et principales coelestium essentiarum, id est inter coelestes essentias, et tantum supereminentes divinis illuminationibus, omnes simul alias coelestes essentias; miror, dico, quod appetunt quaestiones, id est faciunt quaestiones appetentes scientiam, reverenter, id est humiliter sicut humiles et inferiores, et quasi excellentiam illuminationis suae non attendentes; et hoc est quod ait,

“ut mediatae,”

id est velut illae quae medium habent inter se et Deum, et ab aliis erudiri indigent; vel ut mediatae, quia non vere mediatae, quia ad alias quaestionem non faciunt; nec tamen vere immediatae, quia non ad ipsum principium suum, sed adinvicem quaestionem referunt.