Pars 6

Sequitur:

“Haec quidem nominum ipsorum quantum ad nos declaratio.”

Continuat seipsum ad sequentia. Dictis enim cognominationibus trium ordinum, nunc ad eorumdem hierarchiam, id est, sacram potestatem definiendam, et exponendam transit.

“Haec quidem,”

scilicet haec, quam supra diximus,

“est declaratio nominum ipsorum,”

videlicet trium ordinum. Est dico quantum ad nos, id est quantum nobis videtur, vel quantum ad nos est declaratio nominum ipsorum, id est propter nos, ut nobis per nomina declarentur, non propter ipsos, qui sibi, et sine nominibus noti esse possunt.